إِلُفوندو / طنجة
شْمن فرحة وشمْن عيد..هكذا علق أحد المواطنين ساكْن بمنطقة بوكدور ضواحي طنجة، قطعت عليهم شركة أمانديس المفوض لها تدبير قطاع الماء والكهرباء وتطهير السائل بمدينة طنجة الماء لمدة خمسة أيام، وقضاو الغرض غير ببِدونات الماء والبرامْل بحال ناس البادية.
تكرفسنا فهاد العواشر وهاد الحرارة بدون مادة حيوية لي هي الماء، وخا حنا ساكنين فضواحي طنجة، ولكن عايشين حياة البادية في زمن 2023.
فالصورة شاحنة تحمل الماء تابعة لجماعة حجر النحل، دارت على المنازل وفرقت عليهم الماء، وخا هكذاك الناس ماشي فرحانة حيث تكرفست بزاف مع الانقطاع المتكرر للماء دون تدخل يذكر لشركة أمانديس، لي رجعت كتنغص الحياة على المواطنين، مرّة بالزيادة فالفاتورات، ومرّة بقطع الماء، إيوا شنو بغيتو اكثر من هاد المعاناة..، المهم الله ياخذ الحق فلي كان السبب، كقول مواطن متضرر.
