إلْفوندو / طنجة
بعد استكمال المسطرة التي قامت بها عناصر لاپيجي في حق المتهمين الرئيسيين في الإعتداء على الحلاّق بحي ديار طنجة، ولتْسبّبو ليه في عاهة مستديمة، تم عرضهم خلال اليومين لدازت على أنظار المحكمة، التي قررت تأجيل المحاكمة.
المفاجئة لحصلت “إلْفوندو” عليها، أن المتهم الأول في جريمة الإعتداء والمسمى ب “سالم”، هو لي سْبق ليه خطف سيارة الإسعاف من نفس الحومة، وطياحها فْالواد، لكن حيث صاحبنا عندو صاحبو فالعرس ولي هو خليفة أو مْقدم ديال نفس المنطقة، تحكم عليه غير بمدة قصيرة جدا.
دبا نفس الشخص كحاول يخرج صحبو من الحبس، لكن الأمور صعيبة، حيث الصحافة عملت شغلها وعرفت بالجريمة الخطيرة لقام بها هو والعسّاس ديال السيارة، بالإضافة الى شاب أخر يبلغ من العمر 20 سنة.
الضحية رفض التنازل وحسب بعض الكواليس طلب تقريبا 45 مليون كتعويض، خصوصا ان الاعتداء لتعرض ليه سبب ليه عاهة مستديمة وصعيب يرجع للحرفة ديالو.
المهم فهد الأيام عتحكم المحكمة فحق هد الأشخاص لقاموا باعتداء وحشي في حق الحلاق، وخلقوا جو من الرعب فالحي لكسكنوا فيه.
