إلْفوندو / أبو نهى
تطورات سْريعة وغير مسبوقة كتعرفها الساحة السياسية والحزبية بطنجة، وتفاجأ الرأي العام المحلي بمنشورات كدوروها فالواتساب كلها سب وقذف وتشهير واتهامات فالعرض والشرف ابطالها مجهولين عند الناس معروفين عند السياسيين.، هادشي كامل مْرتبط بالحرب الباردة والساخنة لي نايضة بين العمدة ونوابه ورؤساء المقاطعات ومستشارين حول الغنيمة، وانتقلت شرارتها من دورات المجلس الى السْفايه والتخوين والجنس… فمواقع التواصل الاجتماعي عبر حسابات فيسبوكية وهمية وارقام هاتفية مجهولة المصدر.
واطلع موقع إلْفوندو على بعض المنشورات عامرة بالتهم المبطنة ضد مسؤولين منتخبين فالمدينة، بعضها وصل لاتهام نساء ديال الرْجال بالفساد، شوف على مستوى وصلو ليه هاد المنتخبين كقول مسؤول حزبي معروف فطنجة.
واضاف ذات المسؤول، “دوزنا حروبات سياسية بكل ما احمل الكلمة من معنى ولكن ما عمرنا وصلنا للأعراض وندخلو للحياة الخاصة بحال هدشي لي واقع دابا، هذا شغول الشْمايت، السياسة فطنجة توسخت بزاف..”.
هاد الحرب الفيسبوكية الواتسابية وصلت للمحاكم حسب علمنا، والأمن عامل خدمتو، ولا رحمة ولا شفقة اذا حصل لي مور هاد المنشورات.
