إلْفوندو / الجديدة
تستمر جهود الجدارمية فإقليم الجديدة فمحاربة شبكات التهريب الدولي للحشيش اللي كتستغل الكوسطا الممتدة من سيدي بونعايم حتى الوليدية، اللي كيبلغ الطول ديالو حوالي 150 كيلومتر، كمنطلق للعمليات ديال التصدير غير القانونية. هاد التحركات جات من بعد ما تضيق الخناق على المنافذ التقليدية اللي كانت كتستعمل فهاد الأنشطة الممنوعة.
القيادة الجهوية ديال الجديدة اعتمدات واحد الاستراتيجية استباقية باش تحبط العمليات قبل ما توصل للبحر، فمدة أقل من 10 أيام على إحباط محاولة تهريب 4 أطنان ديال الحْشيش اللي كانت مخبأة فواحد الفِيرْما بمنطقة سيدي حمو بجماعة سيدي علي بن حمدوش، جات عملية أخرى ناجحة فالساعات الأولى من صباح الجمعة اللي فاتت فمنطقة الحوزية المجاورة، اللي فيها تم توقيف استعدادات لوجستية لعملية تهريب كبيرة عبر منفذ “الزحيحيف” البحري.
هاد التدخلات الأمنية أسفرت على توقيف 18 شخص عندهم علاقة بهاد العملية، ولاتزال السلطات كتقلب على مستشار جماعي بجماعة الحوزية اللي كيتهموه بأنه وفر المبيت للموقوفين فداخل الضيعة ديالو خلال الأيام اللي دازت. التحقيقات الأولية بيّنات أن هاد الأشخاص كانوا كيوجدو باش يشحنو كميات كبيرة من الحشيش للضفة الأخرى.
السلطات استعملات وسائل تقنية متطورة بحال الطائرات الدْرون وكلاب مدربة، ونْسقوا مع دوريات مراقبة السواحل، فالبداية، اعتقلوا 9 أشخاص، كاملين من الشمال (طنجة تطوان..)، ولقاو معاهم 2 زودياكات، 3 محركات بحرية، و9 مضخات هوائية.
وخلال التحقيق، المعتقلين صرحو أنهم كانوا بصدد استكمال التحضيرات النهائية لعملية التهريب نحو أوروبا، السلطات ما وقفاتش، وبقات كتمشط المنطقة، وهادشي خلاهم يوقفو جوج أشخاص آخرين اللي كانوا فسيارتين من نوع “داسيا” و”رونو”، ولقاو أن واحد منهم روشيرْشي. التحقيق وصلهم حتى لْفِيرما فْملكية المستشار الجماعي اللي كيشكّو فيه.
بالإضافة لهادشي، اعتقلوا 7 أشخاص آخرين اللي كيترجح أنهم منتميّين لشبكة دولية عندها مركز فالأنشطة ديالها فسواحل الشمال (العرائش مولاي بوسلهام الناظور..).
