إلْفوندو / الرباط
عارف المغرب هاد الأيام موجة ديال الغلاء لي شملات حتى الدْجاج، وهادشي زاد من معاناة المواطنين اللي الشراء ديالهم نقص بزاف، وحتى التجار اللي كيشكيو من الركود حيث الثمن ديال الدْجاج بزاااف، وهادشي كيضرب فجيوبهم.
عبد الله بووانو، رئيس المجموعة النيابية ديال البيجيدي، خْرج كِيتسائل على هاد الارتفاع اللي ماشي مفهوم، فْواحد الملتقى نهار الأحد، قال: “اللحم الحمر زاد حيث كاين خصاص فالمواشي والجفاف، نقدروا نتفهمو هاد المبررات، ولكن شنو المبرر باش اللحم الأبيض يْزيد؟ الأعلاف موجودة، الكتاكيت موجودة، والبوطة مدعمة، ففين المشكل؟”.
بووانو رْجع كيهضر على تقرير مجلس المنافسة لي قال أن القطاع كيتحكم فيه غير 3 ولا 5 شركات كْبار، لي كيديرو أرباح كبيرة وكيخليو المواطن كيشري بثمن غالي.
وحذّْر بووانو من أن هاد الزيادات إلا بقات حتى رمضان غادي يكون الوضع أسوأ، وقال: “تجار البيض حتى هوما بداو كينقصو الإنتاج باش يرفعو الثمن فرمضان، وبغاو يوصلو ثمن البيضة لوحد درهمين ولا جوج ونص”.
من جهتهم، المهنيين ديال الدجاج كيشكيو من الركود، حيث بزاف ديال الناس ولاو كيتفادو يشريو الدجاج الحي حيت الثمن ماشي فالمتناول.
الوضع كيبان ماشي وكِتْأزم أكثر إلى ما تلقاوش حلول فعالة تنقص من هاد الغلاء، خصوصا مع اقتراب شهر رمضان اللي كيزيد فيه الطلب على هاد المواد.
