إلْفوندو / تطوان
النيابة العامة في تطوان بدات تحقيق معمق مع 2 ديال القاصرات اللي تشدو فكاسطياخو (الفنيدق) كيلبسو لباس ديال الدرك الملكي وكيجولو بيه فالشوارع، وهو الأمر اللي خلا الشكوك تحوم على الأسباب الحقيقية وراء هاد التصرف.
القضية بدات ملي لاحظ دركي، الفتاتين كيلبسو اللباس الرسمي وسألهم على الخدمة والمهمات ديالهم، ولكن ارتباكهم وعجزهم على الإجابة خَلاّه يْبلغ رؤساؤه، وتم توقيفهم للتحقيق، من بعد التحريات الأولية، تأكد أن هاد الفتاتين ما عندهم حتى علاقة بالجدارمية، وأنهم حصلو على اللباس فظروف مازال مجهولة.
التحقيق حاليا كيركز على منين جا هاد اللباس واش كاينين أطراف أخرى متورطة، خاصة فواحد المنطقة اللي معروفة بالنشاط ديال التهريب والجريمة المنظمة بحال الاتجار بالبشر والمخدرات، كيتحاول أيضا معرفة واش الهدف كان النصب ولا شي غرض مشبوه آخر.
القاصرات دابا تحت المراقبة القضائية، وتم استدعاء الوالدين ديالهم للتحقيق، مع إعداد محاضر رسمية على الواقعة اللي ممكن تشمل تهم بحال التغرير بقاصر واستغلال اللباس الرسمي بشكل مخالف للقانون. النيابة العامة غادي تقرر الإجراءات المناسبة من بعد ما تكمل التحريات وتحدد المسؤوليات القانونية ديال هاد الواقعة.
