إلْفوندو / طنجة
رئيس غرفة جرائم الأموال بمحكمة الاستئناف فالرباط أمر بإطلاق بحث غيابي على رئيس جماعة كزناية السابق بطنجة أحمد الإدريسي، بعدما تْغيب على 12 جلسة متتابعة من بداية يناير 2024، رغم أنه المتهم الوحيد فالملف اللي كيتعلق بتلاعبات فالتجزئات العقارية.
باش يقدروا يوصلوا ليه، المحكمة قررات تراسل الإذاعة الوطنية باش تبث إعلان على الغياب ديالو 3 مرات فْالسِمانة، وتطلب من أي مواطن يعرف مكان وجودو يبلغ أقرب مصلحة أمنية، فالمقابل، كاينين إجراءات بحال عقل ممتلكاته ونشر الإعلان ديالو فأقرب المحاكم.
القيادي السابق فْحزب البام، كيتابع بتهم بحال استغلال النفوذ والارتشاء بعدما باع عقارات لمهاجر مغربي وزوجتو بمبالغ كبيرة، ولكن كان كيتلاعب فالتصريحات المالية للعقود، زيد عليها، دار دورة استثنائية فالبرلمان الجماعي وصوت على نزع ملكية عقارات سبق وباعها، باش يْبرر أنها للمنفعة العامة.
المشتكي قال أن الرئيس استعمل السلطة ديالو باش يمنع حضورهم للجلسات، وحتى فرض ضرائب كبيرة على العقارات لي باعها ليهم. القضية دابا كتحقق فيها النيابة العامة، والجلسة الجاية تحددات فـ24 فبراير.
