إلْفوندو / تطوان
فخطوة قانونية مهمة، فعلات السلطات المحلية اليوم قرار عزل رئيس جماعة مرتيل مراد أمنيول، اللي كينتمي لحزب الحركة الشعبية، بعدما ولات عندو حالة فقدان الأهلية الانتخابية بقرار نهائي من محكمة النقض.
القصة بدات منين محكمة الاستئناف بتطوان فـ29 ماي 2024 ثبتات الحكم الابتدائي اللي دان أمنيول بتهمة المشاركة فـ تزوير محررات عرفية، وحكمات عليه بـ8 شهور حبس موقوف التنفيذ، من بعد، فـ22 يوليوز 2025، محكمة النقض رفضات الطعن ديالو، وولات القضية نهائية وما بقاتش قابلة للنقاش.
وبحسب القوانين التنظيمية اللي كتنظم الانتخابات، أي منتخب كيتحكم عليه بحكم نهائي وكيولي فاقد الأهلية الانتخابية، كيتعزل تلقائيا وكيعتبر مستقيل بقوة القانون، وهكذا فعّل عامل عمالة المضيق الفنيدق قرار العزل رسميا.
وبهاد الشكل، ولى منصب رئيس جماعة مرتيل شاغر، وكيتسناو دابا الشروع فالإجراءات القانونية باش يتختار رئيس جديد يعوض مراد أمنيول.
