إلْفوندو / المغرب
في خطوة كبيرة على المستوى الدولي، صوّت مجلس الأمن بأغلبية لصالح مقترح الحكم الذاتي ديال المغرب كحل لقضية الصحراء المغربية تحت السيادة الكاملة للمملكة.
الجلسة دارت فمقر الأمم المتحدة فنيورك، وكانت طويلة وعمرها النقاش بين الدول، قبل ما يتحسم التصويت لصالح المبادرة المغربية اللي وصفوها بأنها الحل الواقعي والوحيد لإنهاء النزاع اللي دار عقود.
المصادر الدبلوماسية قالت باللي القرار الجديد كيعتبر تحول كبير فالموقف الأممي، حيث حصل المقترح المغربي على دعم دول كبيرة بحال أمريكا وفرنسا وبريطانيا، وزيد عليهم دول إفريقية وعربية اللي شافو باللي المبادرة المغربية هي السبيل باش يكون الاستقرار والتنمية فالمنطقة.
القرار كيدعم جهود المغرب باش ينفذ مشروع الحكم الذاتي كإطار للحل السياسي، وكيطلب من جميع الأطراف المشاركة بشكل إيجابي فهاد العملية السياسية، مع الإشادة بالإصلاحات الكبيرة اللي وقعات فالأقاليم الجنوبية خلال السنوات الأخيرة.
من جهة أخرى، جبهة البوليساريو وبعض الدول اللي واقفة معاها عبّرت على رفضها للقرار وكتعتبره “انحياز للمغرب”، بينما المغرب أكد باللي التصويت كيأكد الاعتراف الدولي بسيادته على الأقاليم الجنوبية ونجاح سياسته الخارجية الواقعية والتوافقية.
المراقبين كيقولوا باللي هاد التصويت كيشكل منعطف مهم فمسار قضية الصحراء، حيت كيقر لأول مرة على مستوى مجلس الأمن بالجدية ديال المقترح المغربي كخيار أممي، وكيهيّأ الطريق لحل نهائي للنزاع اللي دام سنوات طويلة.
