إلْفوندو / طنجة
قاضي التحقيق فطنجة أمر اليوم الأربعاء بحبس رئيس رابطة تجار سوق فندق الشجرة فـ سجن طنجة 2 احتياطيا، بعدما تورط فملف فيه بزاف ديال الشبهات.
وحسب ما سْمعت آذان إلْفوندو، فجوج التجار كانو قدموا شكاية لوكيل الملك، كيتهمو فيها رئيس الرابطة بالتلاعب فطريقة توزيع المحلات داخل السوق بعد ما تدار فيه الإصلاح.
الشرطة القضائية فطنجة كانت بدات تستمع ليه فحالة سراح، ومن بعد تحال الملف على وكيل الملك اللي قرر يديه لقاضي التحقيق، واللي بقى كيسول فالتفاصيل ديال القضية لأسابيع حتى خرج بقرار الحبس الاحتياطي.
المتهم متابع بتهم ثقيلة بحال استغلال النفوذ، والنصب، والاحتيال، وحتى الاستيلاء على ملك الغير. وكيقول المشتكون أن التوزيع ما كانش نزيه، حيث كاينين ناس خداو جوج محلات رغم أنهم فالأصل كانو عندهم غير واحد قبل الإصلاح.
ومن جهة أخرى، مصادر أكدت أن السلطات الولائية دخلات على الخط وسولات عدد من القياد اللي تابعين للمناطق المحيطة بالسوق، على ود الشبهات ديال التلاعب فعدد ومساحات المحلات اللي توزعات.
