إلْفوندو / الرباط
وزير الصحة أمين التهراوي صيفط دورية جديدة لمدراء الصحة فجهة طنجة تطوان الحسيمة، كيأكّد فيها على ضرورة تنظيم وتحسين الاستقبال فالمستشفيات، ومنع أيّ تدخل ديال الحراس أو عاملات النظافة فهاد المهمة.
الوزارة قالت أن حسن الاستقبال جزء أساسي من تجربة المريض، وخصّ المؤسسات الصحية تبدا بشكل مستعجل تعيد تنظيم هاد الخدمة، وتعيّن ناس مكوّنين ومسؤولين عليها فكل نقطة استقبال، وما يبقا حتى بلاصة خاوية فخارج أوقات العمل.
الدورية شددت كذلك على ضرورة تعيين مسؤول يشرف كل نهار على فريق الاستقبال، وتوزيع الدليل الوطني للتحسين ديال هاد العملية.
وفالمقابل، تمنع الوزارة أي موظف ماشي معني بالاستقبال يدخل فهاد الخدمة، بحال النظافة، الصيانة، والحراسة.
وخلاصتها: نجاح هاد الإصلاح مرتبط بالتزام الجميع، باش يكون الاستقبال فالمستشفيات لائق وإنساني ويرجع الثقة بين المواطنين وقطاع الصحة.
