إلْفوندو / طنجة
استنفرت السلطات المحلية كل مصالحها البارح الجمعة، بعد انهيار مفتجئ لطريق رئيسية بحي العالية بطنجة، وجرفت معاها جزء من الطريق اللي كيدوز حدّا واحد الإقامة اللي باقي ماكملاتش البني. هاد الشي خلا السلطات كتتحرك بسرعة وكتستنفر جميع المصالح باش تأمن المكان وتبعد الناس من المنطقة حتى ما يوقع حتى خطر.
المعلومات اللي وصلات كتشير بلي الهبوط خلق حفرة كبيرة فوسط الطريق، ولكن الحمد لله ما كان حتى مصاب، السلطات وصلات مباشرة بعد ما توصلات بالخبر، وسدّات المسار قدّام المواطنين باش ما يقرب حتى واحد.
مصادر قريبة من الملف ما استبعداتش يكون المشكل عندو علاقة بالحفريات اللي كتدار فذاك المشروع السكني ديال واحد المنعش معروف فطنجة. وكتقول هاد المصادر أن الحفر العميق ولا عدم احترام معايير السلامة ممكن يكون ضعف التربة اللي حدّا الطريق وسبّب فهاد الانهيار المفاجئ.
ومن المرتقب تبدا الفرق التقنية تحقق فالموضوع باش تعرف السبب الحقيقي ديال الهبوط، وشنو حجم الضرر اللي وقع فالبنية ديال الطريق.
