إلْفوندو / الشمال
سْجلات عدد من مدن واقاليم الشمال فهاد الايام تساقطات مطرية مهمة، وهاد الشي خلق ارتياح كبير عند سكان المناطق الجبلية لي كيعتمدوا على الزيتون، وزاد حتى فالمخزون المائي ديال الجهة باكثر من 4 ملايين متر مكعب فاقل من سيمانة.
وحسب مصادر محلية، فعملية جني الزيتون غادي تعرف واحد النشاط كبير بعدما الفلاحين كانو كيسناو الشتا باش تعاونهم فالجني وترفع جودة الزيت المستخرج من الثمار.
ومن جهة اخرى، الفرشة المائية فحوض اللوكوس عرفات تحسن واضح، حيث مناطق الشمال كانت من بين الاكثر تسجيلا للتساقطات فالمغرب فهاد الفترة.
ومعطيات رسمية كتقول ان حقينة السدود فحوض اللوكوس تزادات ما بين 13 و17 نونبر بحوالي 4 ملايين متر مكعب، وولات كتسجل 866.5 مليون متر مكعب بعدما كانت 862 مليون فايام قليلة.
وهناك تفاؤل كبير عند المسؤولين فجهة طنجة تطوان الحسيمة باستقبال مزيد من السحب الممطرة فالسيمانات الجاية، الشي لي غادي يحسن وضع السدود ويرفع نسبة الملى ديالها.
