إلْفوندو / القصر الكبير
لقاو فالصباح ديال الأربعاء 26 نونبر جثتين ديال جوج دراري صغار فحوض مائي فواحد الدوار تابع لجماعة سوق الطلبة نواحي القصر الكبير فالعرائش، الطفلين من مواليد 2010 و2014 وكانو غابرين من عصر نهار الاثنين وهما خارجين بدراجاتهم الهوائية.
ملي توصلو الدرك والشرطة العلمية والوقاية المدنية والسلطات للمكان، دارو عملية انتشال للجثتين وتم نقلهم بسيارة نقل الاموات لمستشفى القرب فالقصر الكبير، باش يديرو ليهم التشريح الطبي ويعرفو السبب الحقيقي للوفاة.
الضحايا من حي الشرفاء فالقصر الكبير، واختفاءهم كان دار حالة استنفار كبيرة قبل ما يتكشف هاد المصير المؤلم.
