إلْفوندو / هيئة التحرير
حسب آخر التوقعات اللي خرجات من المديرية العامة للارصاد الجوية، الحالة الجوية غادي تعرف تبدل ابتداء من مساء اليوم الثلاثاء وغدا الاربعاء، حيث البلاد داخلة فاضطراب جوي جديد فيه انخفاض باين فدرجات الحرارة ورجوع الشتا والثلوج خصوصا فالشمال والشرق والمناطق الجبلية.
المعطيات الرسمية كتأكد ان بزاف ديال المناطق غادي يشهدو فالسيمانات الجاية تغييرات مهمة فالحالة الجوية، من بينها برودة واضحة ورجوع التساقطات فالشمال والشرق، مع استمرار البرد فالليل وبداية الصباح، وزيد عليه طقس متقلب فالمناطق الشمالية.
وابتداء من اليوم غادي يسود طقس بارد إلى بارد نسبيا فعدد من الجهات، خاصة فالمرتفعات والجنوب الشرقي والجهة الشرقية، مع بداية نزول الشتا والزخات على طنجة واللوكوس والريف والساحل المتوسطي والغرب وسايس، وغادي تمتد خلال الليل حتى للاطلس الكبير والمتوسط وشمال المنطقة الشرقية، بعض السهول الاطلسية الشمالية ممكن تعرف زخات متفرقة، فالوقت اللي الثلوج غادي ترجع للمرتفعات ديال الاطلس المتوسط والريف ابتداء من الليلة.
