إلْفوندو / سبتة
مع اقتراب راس السنة، رْجعت سبتة المحتلة عايشة واحد الاستنفار كبير فالبحر والبر، بعدما تزادت محاولات الهجرة سباحة من السواحل المغربية، خصوصا فهاد الايام اللي كيكون فيها الضغط كبير على الحرس المدني.
مصادر اسبانية كتقول باللي الدوريات البحرية والبرية تزادت، والحرس المدني خدام بلا توقف، حيث كل شوية كيتسجلو تدخلات لانقاذ شبان دارو المغامرة وسط البرد والبحر الهائج، وبعضهم كيوصل لحالات صحية خطيرة.
اغلب المحاولات كتكون من نقاط معروفة بحال تراخال، الريسينتو، والمناطق الساحلية اللي قريبة من المدينة، فين كيبقى السباق مع الوقت لانقاذ الارواح قبل ما توقع الكارثة.
ورغم هاد الضغط كامل، كيبقى العدد الحقيقي للمحاولات مخفي، حيث السلطات الاسبانية كتعترف غير بحالات الدخول الرسمية، وكتسكت على الاف المحاولات اللي كتسالي بالانقاذ او الرجوع القسري، الشي اللي كيعكس واقع صعيب على حدود سبتة المحتلة.
