إلْفوندو / المغرب
أكد وزير التجهيز والماء نزار بركة أن المغرب خرج رسميا من فترة الجفاف اللي عاشها لسبع سنين، بعدما سجلت التساقطات هاد الموسم تحسن كبير، وهادشي كيسالي سلسلة سنوات ديال العجز المائي.
وزير التجهيز والماء قال فجلسة الأسئلة الشفهية فمجلس النواب يوم الاثنين 12 يناير 2026 أن الفترة من فاتح شتنبر 2025 حتى 12 يناير 2026 عرفات تساقطات مطرية وصلات 108 مليمتر، يعني فيها زيادة بنسبة 95 فالمية مقارنة مع نفس الفترة ديال العام اللي فات، وهادشي كيبان تحول إيجابي فالوضعية المناخية بالمغرب.
وأضاف بركة أن هاد التساقطات فاقت المعدل الطبيعي بنسبة 17,6 فالمية، ووضح أن السنة كتعتبر جافة إلا كانت التساقطات ناقصة على المعدل الطبيعي بأكثر من 20 فالمية، وبهذا كيأكد المغرب خرج رسميا من سبع سنين ديال الجفاف.
وزاد الوزير أن التساقطات الثلجية كانت حتى هي كبيرة، بحيث المساحة المغطاة بالثلوج وصلات تقريباً 55 ألف و495 كيلومتر مربع، رقم قياسي اللي غادي ينعكس إيجابيا على الموارد المائية، خصوصا المخزون الجوفي والحقينات ديال السدود، وكيعطي أمل لتحسن الوضع المائي فالأشهر القادمة.
