إلْفوندو / القصر الكبير
ما زالت التساقطات المطرية الغزيرة كتعرفها مدينة القصر الكبير، والوضع ولى مقلق بزاف بسبب الارتفاع الكبير فمستوى المياه، خصوصا مع وضعية سد وادي المخازن اللي شدات انتباه الساكنة وحبسات الأنفاس ديال آلاف العائلات، خاصة فالأحياء اللي ولات شوارعها غارقة والماء دخل للديور ووصل فبعضها حتى قرابة متر، الشي اللي خلا السكان يضطرو يخرجو ويخليو منازلهم.
سكان أحياء الأندلس، المرينة، السلام، والمسيرة عاشو ليلة صعيبة وقاسية، من بعد ما تدفقات كميات كبيرة ديال المياه نتيجة الشتا الغزيرة وتنفيـس سد وادي المخازن، خصوصا بعدما فاقت نسبة الملء ديالو مائة فالمائة، وزاد الضغط على المجال الحضري ديال المدينة.
فيديوهات متداولة بين السكان بينات الارتفاع الخطير لمنسوب المياه داخل الأزقة، سيارات غارقة، ومياه كتفور من قنوات الصرف الصحي اللي ما بقاتش قادرة تستوعب هاد الحجم ديال السيول، وغمرات كلشي فطريقها.
دقة وحساسية الوضع بانَت أكثر مع عملية إجلاء المرضى من المستشفى المحلي، من بعد ما طلع منسوب المياه فالمحيط ديالو وبقى كيزحف بشكل مقلق، ما خلا السلطات تاخذ قرار الإخلاء تفاديا لأي خطر.
ورغم التحركات اللي دارتها السلطات المحلية والمجلس الجماعي، إلا أنها باينة محدودة قدام قوة التساقطات وحجم المياه، وسط تخوفات متزايدة من سيناريوهات كارثية ممكن تهدد سلامة المدينة وساكنيها إلا ما تحسنش الوضع فالوقت القريب.
