إلْفوندو / القصر الكبير
عدد من سكان القصر الكبير فضلو يخرجو من ديورهم بشكل مؤقت، حيت كاين تخوف يرجع يطلع منسوب واد اللوكوس، مع توقع تساقطات مطرية قوية ابتداء من نهار الاثنين، اللي ممكن تعاود تغرق احياء فالمدينة.
فالهاد الظرفية، السلطات المحلية تحركات بسرعة، وبدات كتعاون العائلات اللي ساكنة فالمناطق المهددة بالفيضانات باش تمشي لاماكن امنة، يا اما داخل القصر الكبير ولا لمدن قريبة، تفاديا لاي خطر.
وتم تسخير اكثر من سبعين حافلة لنقل الناس اللي باغيين يغادرو المدينة مؤقتا، خصوصا بعدما تضررات بعض الطرق ووقعات اختلالات فشبكتي الماء والكهرباء بسبب ارتفاع منسوب المياه.
وزارة التجهيز والماء اعلنت بدورها على انقطاع مؤقت فحركة السير فالطريق الوطنية رقم واحد والطريق الجهوية اربعمائة وعشرة، نتيجة غمر مقاطع منها بمياه واد اللوكوس، الشي اللي زاد صعب التنقل من والى المدينة.
ومن جهتها، جماعة القصر الكبير قالت باللي تنسقات مع المكتب الوطني للسكك الحديدية باش يتأمن تنقل المواطنين بالقطار نحو مدن امنة، فاطار تدابير استثنائية كتهدف تحافظ على سلامة الساكنة.
هاد الاجراءات جات مع نشرة انذارية جديدة ديال الارصاد الجوية، كتحذر من امطار قوية وزخات رعدية فاقاليم حوض اللوكوس، خصوصا وان سد واد المخازن عامر مائة فالمائة، الشي اللي كينذر بارتفاع جديد فمستوى الواد فالايام الجاية.
