طنجة تتفوق على كازا وتصير أغلى مدينة فالمغرب

إلْفوندو / طنجة

كشفت إحصائيات جديدة ديال مؤشر نومبيو على تكلفة المعيشة، باللي طنجة ولات هي المدينة الغالية اكثر فالمغرب من حيث مصاريف العيش، وهاد المعطيات دارت نقاش كبير وسط الساكنة ديال الشمال.

وحسب نفس المنصة، مدينة البوغاز فاقت الدار البيضاء اللي كانت شادة الصدارة لسنين طويلة، وولات طنجة هي الاولى فتصنيف تكلفة المعيشة على الصعيد الوطني.

التقرير بيّن باللي طنجة تصدرت اللائحة بنسبة 36,53 فالمائة، وجات من وراها الدار البيضاء بنسبة 35,64 فالمائة، ومن بعد الرباط بنسبة 34,38 فالمائة، ثم مراكش بنسبة 32,71 فالمائة.

هاد الارقام كتعكس الارتفاع الكبير فثمن الكراء، المعيشة، والخدمات، وكتطرح اكثر من علامة استفهام على القدرة الشرائية ديال المواطنين، خصوصا فالمدن اللي ولات كتستقبل اعداد كبيرة ديال الوافدين والاستثمارات.