إلْفوندو / طنجة
شهدات مدينة طنجة، مع العشية ديال نهار السبت، تساقطات مطرية قوية فجأة وفوقت قصير، وخلات عدد من الشوارع والاحياء فعدة مقاطعات يغرقو فالماء.
فمنطقة رياض تطوان وسط المدينة، تجمعات كميات كبيرة ديال الشتا، ودخلات المياه حتى لواحد القهوة حد المدار الحيوي فعروس الشمال، الشي اللي خلا فرق شركة التدبير المفوض تدخل باش تحل قنوات الصرف وتسهل تصريف المياه.
الشتا الغزيرة غرقت حتى احياء العوامة، بني مكادة، بلاصا طورو، بير الشيفا، وبن ديبان، وزيد عليهم مناطق اخرى، حيث قنوات التطهير ما قدرتش تستوعب هاد الكمية الكبيرة ديال الماء.
ونشطاء فمواقع التواصل الاجتماعي تناقلو فيديوهات وتصاور كتبينو الازقة والشوارع وهي غارقة فمدة قصيرة، وطالبو بتنقية وتسريح قنوات الصرف باش يتفادى تجمع المياه خصوصا فالمناطق المنخفضة.
وكتبقى طنجة من بين المدن اللي كتستقبل الشتا بزاف فالمغرب، ومع كل شتاء كترجع نفس المشاهد ديال غرق الشوارع، وسط انتقادات كبيرة للمجالس المنتخبة على ضعف الاستعداد والعجز فالتعامل مع هاد الوضع.
