إلْفوندو / طنجة
كوارث طنجة ما بغاتش تسالي، والسبب هو العشوائية اللي ولات كتطبع تسيير شؤون المدينة، والفضائح اللي كتخرج للعلن وحدة مور وحدة، وكتكشف على اختلالات خطيرة فطريقة تدبير الملفات داخل جماعة طنجة.
آذان إلْفوندو وصلها كلام مثير على موظف متقاعد، كان ديما كيتوصف وسط بعض المنتخبين والموظفين بـ«العلبة السوداء» ديال جماعة طنجة، بحكم قربه من رؤساء سابقين تعاقبوا على كرسي العمودية، ومعرفته بخبايا الملفات والأسرار اللي كتدور داخل دهاليز الجماعة.
هاد الموظف، حسب المعطيات اللي توصلات بها «إلفوندو»، كان من المقربين بزاف للعمدة المعتقل منير ليموري، وحتى ملي وصل لسن التقاعد الإداري، وكثرات عليه الانتقادات والهدرة، تم نقله إلى مكتب بمؤسسة مجموعة البوغاز، اللي ما كتبعد على مقر الجماعة غير بأمتار قليلة.
لحد هنا، ممكن نقولو الأمور عادية نسبيا، رغم أن الوضعية الإدارية والقانونية ديال تواجد موظف متقاعد داخل هاد المؤسسة كتحتاج للتوضيح.
ولكن اللي ماشي عادي، هو المعطيات اللي كتقول إن بعض رؤساء المصالح مازال كينقلو ملفات ووثائق مرتبطة بجماعة طنجة إلى المكتب ديالو بمؤسسة البوغاز، باش يطلع عليها ويعطي الرأي ديالو فيها، بل وحتى تأشيرات شفوية، وكأنه مازال مسؤول داخل الجماعة!
والسؤال المطروح: بأي صفة قانونية كيطلع موظف متقاعد على وثائق وملفات الجماعة؟ وشكون عطاه الحق باش يتدخل فمساطر إدارية من المفروض أنها اختصاص حصري للمسؤولين والموظفين اللي مازالو كيمارسو مهامهم؟
والأكثر إثارة، هو ما يتردد بشأن اتصالات متواصلة بين هاد الموظف ومسؤول داخل ولاية جهة طنجة تطوان الحسيمة، وهو الأمر اللي كيطرح تساؤلات إضافية حول طبيعة هاد العلاقة، وحدودها، وما إذا كانت عندها شي علاقة بتدبير ملفات الجماعة.
المعني بالأمر، حسب شهادات متداولة، كان كيعرف الصغيرة والكبيرة داخل الجماعة، وخصوصا أسرار العمدة، حتى ولى عند البعض بمثابة الأذن اللي كتسمع كلشي، و«فكّاك المحاين» و«مفتي الجماعة» اللي كيقترح الحلول والمخارج للملفات المعقدة، سواء كانت هاد الحلول سليمة قانونيا أو كتثير علامات استفهام.
وطبعا، ما غاديش نتهمو حتى واحد بشي حاجة بلا دليل، ولكن من حق الرأي العام يعرف شكون كيسير فعليا ملفات جماعة طنجة، وواش كاينين أشخاص من خارج المؤسسة المنتخبة مازال عندهم نفوذ على قراراتها.
ولهذا، السؤال اليوم موجه للسيد يونس التازي، والي جهة طنجة تطوان الحسيمة:
واش غادي تتحرك مصالح الولاية للتحقق من الوضعية القانونية لهاد الموظف المتقاعد داخل مؤسسة مجموعة البوغاز؟ وشنو طبيعة المهام اللي كيقوم بها؟ وواش فعلا كتوصل عندو وثائق وملفات جماعة طنجة للاطلاع عليها وإبداء الرأي بشأنها؟ وإذا ثبت هاد الشي، شكون سمح به وبأي سند قانوني؟
