إلْفوندو / طنجة
قامت جريدة إلْفوندو الالكترونية ببحث صغير على هوية مول قصر كبير شد انتباه بزاف ديال الناس بسبب الفخامة ديالو، واللي تبنى فتراب منطقة دار الشاوي، وحسب المعطيات اللي توصلنا بها، فهاد القصر راجع لمنتخب معروف ومن الوجوه النافذة المنتمية لحزب الأصالة والمعاصرة.
القصر مازال فمرحلة الفِينيسْيون وعندو جميع الرخص القانونية اللازمة حسب مصادر مسؤولة، ولكن اللي خلا بزاف ديال الناس يتساءلو هو الثروة الكبيرة اللي بان عليها هاد المنتخب خلال السنوات الأخيرة، واللي ولات موضوع نقاش وسط الساكنة والمهتمين بالشأن المحلي.
بعض المتتبعين كيسولو واش فعلا التجارة والأنشطة الاقتصادية اللي كيمارسها كافية باش تفسر هاد الطفرة الكبيرة فالثروة والاستثمارات، خصوصا أن بزاف ديال مظاهر الثراء ما بانوش بهاد الشكل إلا من بعد انتخابات شتنبر 2021، وهو الشي اللي خلا علامات الاستفهام تكبر أكثر من الأجوبة.
وفالوقت اللي ما كاين حتى توضيح رسمي بخصوص هاد التساؤلات، بقى القصر حديث الناس فالمنطقة، خصوصا اللي كيدوزو من تما وكيوقفو عند الحجم ديالو والتجهيزات اللي باينة فيه، واللي بغا يخضر عينيه ويعوم فلابسين ديال الروعة، غير يدوز دورة حدا قصر السي المنتخب النافذ.
