إلْفوندو / طنجة
تلغات بشكل رسمي المباراة الودية اللي كانت غادي تجمع اتحاد طنجة بنادي برشلونة الإسباني، واللي كان مبرمج تتلعب نهار 15 غشت فالملعب الكبير بطنجة.
وحسب مصادر مطلعة، فالسبب الحقيقي وراء إلغاء الماتش ما عندو حتى علاقة بالأحداث الأخيرة اللي عرفاتها سبتة، وإنما راجع لتأخر مسؤولي برشلونة فحسم مجموعة من الترتيبات التنظيمية واللوجستيكية الخاصة بالمواجهة، وهو الشي اللي خلا الوقت ما يبقاش كافي باش يتنظم اللقاء بالشكل المطلوب.
وأضافت نفس المصادر أن النادي الإسباني ما كملش جميع الإجراءات والترتيبات الضرورية لتنظيم المباراة، وهو ما أدى فالأخير إلى إلغائها.
ولحد الساعة، ما خرج حتى بلاغ رسمي من برشلونة ولا من الجهة المنظمة كيحدد واش غادي يتبرمج الماتش فموعد آخر أو غادي يتلغى بشكل نهائي.
وفالمقابل، كشفت وسائل إعلام إسبانية أن إدارة برشلونة غادي تعقد اجتماع مع المدرب هانزي فليك باش تناقش إمكانية برمجة مباراة ودية بديلة، استعدادا لانطلاق منافسات الدوري الإسباني.
