إلْفوندو / مدريد
دْخلات إسبانيا فخلاف جديد مع إيطاليا، بعدما وجهات ليها إنذار رسمي وطالبتها تلغي فورا القيود الحدودية اللي فرضاتها على المسافرين الجايين من إسبانيا، قبل نهار الأحد 9 غشت، ملوحة باتخاذ إجراءات مضادة إلى ما تراجعاتش روما على هاد القرار.
واعتبرات الحكومة الإسبانية أن القرار الإيطالي، اللي بدا تطبيقو من فاتح غشت، ما عندوش أي مبرر قانوني، وكيشكل تمييز ضد المواطنين الإسبان، بالإضافة إلى أنه كيتعارض مع قواعد التنقل داخل فضاء شنغن.
وردا على تبرير إيطاليا بأن هاد الإجراءات جات بسبب تدفق المهاجرين نحو مدينة سبتة المحتلة، أكدات مدريد أن الوضع القانوني ديال سبتة ما كيسمحش بانتقال المهاجرين بشكل حر إلى فضاء شنغن، مضيفة أن أغلب المهاجرين اللي وصلو للمدينة رجعو بالفعل إلى المغرب.
وكيجي هاد التوتر فوقت كيتواصل فيه الجدل داخل أوروبا حول تدبير ملف الهجرة، وسط ترقب واش غادي تتراجع إيطاليا على قرارها أو يتطور الخلاف بين الجانبين خلال الأيام المقبلة.
