إلْفوندو / المغرب
خلق إحصاء جزئي لرؤوس الأغنام فعدد من المناطق القروية بجهة طنجة تطوان الحسيمة، خصوصا فالعرائش ووزان وطنجة، جدل كبير وسط الفلاحين والكسابة، بعدما انتشرت أخبار كتقول بأن الحكومة كتوجد باش تصرف دعم جديد بقيمة 800 درهم على كل رأس من الأغنام.
وحسب معطيات من مهنيين فالقطاع، فإن لجان فيها رجال السلطة وأعوانهم خرجات لعدد من الدواوير، وقامت بإحصاء الأغنام عند بعض الكسابة دون الآخرين، وهو الشي اللي خلا بزاف ديال المربين يتساءلو علاش تم اختيار أشخاص معينين واستثناء الباقي من هاد العملية.
وزادت فيديوهات منتشرة فمواقع التواصل الاجتماعي من البلبلة، بعدما ربطات هاد الإحصاء بإمكانية صرف دعم مالي جديد لفائدة مربي الماشية.
لكن مصادر مطلعة نفت هاد الأخبار، وأكدت أن الإحصاء ما عندو حتى علاقة بشي دعم جديد، وإنما كيتعلق بأخذ عينات من القطيع باش يتم تتبع تطور أعداد الأغنام على الصعيد الوطني، ومقارنتها مع نتائج الإحصاء اللي دارتو الحكومة السابقة.
وشددات نفس المصادر على أن الأخبار اللي كتروج بخصوص صرف 800 درهم على كل رأس من الأغنام ما عندها حتى أساس من الصحة، مؤكدة أن الجهات المعنية خاصها تخرج بتوضيح رسمي باش تحيد الغموض وتوقف انتشار الإشاعات وسط الكسابة.
وكيجي هاد الجدل بعدما كانت وزارة الفلاحة أعلنت استفادة حوالي مليون و20 ألف مربي للماشية من الشطر الثاني ديال الدعم المخصص للحفاظ على إناث القطيع، بغلاف مالي وصل لـ4.72 مليار درهم، خلال الفترة الممتدة من مارس حتى 20 يوليوز 2026.
