إلْفوندو / سبتة المحتلة
أثار رامون كوديفيلا، المسؤول السابق على إدارة الهجرة بمدينة سبتة المحتلة، جدل واسع بعدما خرج بتصريحات لصحيفة «إل موندو» الإسبانية، انتقد فيها الطريقة اللي كيتدبر بها ملف الهجرة والقاصرين غير المصحوبين فإسبانيا.
كوديفيلا، اللي قضى حوالي 32 عام فهاد المنصب قبل ما يتقاعد فشهر يناير اللي فات عن سن 65 عام، قال إن التجربة الطويلة ديالو فسبتة خلاتو يكون شاهد على تحولات كبيرة عرفها ملف الهجرة، خصوصا مع تزايد وصول القاصرين للمدينة بلا عائلاتهم.
وحسب المسؤول الإسباني السابق، فإن النظام المعمول به فإسبانيا كيخلق، حسب تقييمو، نوع من الحوافز اللي ممكن تشجع على الهجرة غير النظامية، خاصة فالحالات اللي كتفتح من بعد الباب أمام إجراءات مرتبطة بلم شمل الأسر.
وكشف كوديفيلا أنه سبق ليه سنة 2003 ناقش ظاهرة وصول القاصرين لسبتة مع مسؤول مغربي كانت كتجمعو به علاقة مهنية، فواحد المرحلة اللي كان فيها هاد الملف بدا كياخذ أبعاد أكبر على مستوى المدينة.
تصريحات المسؤول السابق رجعات من جديد النقاش فإسبانيا حول طريقة التعامل مع القاصرين غير المصحوبين، خصوصا فسبتة اللي بقات خلال السنوات الأخيرة واحدة من أبرز النقط اللي كتعرف ضغط كبير بسبب محاولات الهجرة غير النظامية.
