إلْفوندو / اسبانيا
دخل رافاييل لوسان، رئيس الاتحاد الإسباني لكرة القدم، بقوة على خط النقاش حول شكون غادي يحتاضن نهائي كأس العالم 2030، اللي غادي يتنظم بشكل مشترك بين المغرب وإسبانيا والبرتغال، بعدما أكد باللي الهدف الكبير ديال بلادو هو تنظيم المباراة النهائية.
لوسان، وفي تصريحات لإذاعة “راديو ناسيونال دي إسبانيا”، قال باللي ما كيشوف حتى معنى باش يتلعب نهائي المونديال خارج إسبانيا، معتبرا أن بلادو كانت من البداية في قلب مشروع تنظيم كأس العالم إلى جانب البرتغال.
رئيس الاتحاد الإسباني زاد دافع على موقف بلادو، وقال إن إسبانيا والبرتغال كيمثلو، حسب تقديرو، 55 فالمائة من الثقل المرتبط بتنظيم مونديال 2030، وهو الشي اللي كيشوف أنه كيقوي حظوظ الإسبان باش يحتاضنو النهائي.
هاد التصريحات رجعات من جديد النقاش حول الملعب اللي غادي يستقبل أهم مباراة فالمونديال، خصوصا مع الطموح المغربي الكبير لاحتضان مباريات من العيار الثقيل، وسط استمرار الاستعدادات والمشاريع الرياضية والبنيات التحتية المرتبطة بتنظيم كأس العالم.
وفي موضوع آخر، كشف لوسان أن الاتحاد الإسباني بدا المفاوضات مع لويس دي لا فوينتي باش يمدد العقد ديالو مع المنتخب حتى لـ2030، عوض 2028، بعدما عبر عن رضاه على الخدمة والنتائج اللي حققها مع “لاروخا”.
