إلْفوندو / طنجة
ما بِه ما عْليه جمهور اتحاد طنجة لكرة القدم كتابع أخبار الإنتدابات، حتى تفاجأ ليلة أمس الأحد باستقالة محمد الشرقاوي من رئاسة نادي اتحاد طنجة، نزلها فصفحته الرسمية في الفيسبوك دون تقديم الأسباب والدوافع.
استقالة الشرقاوي كانت صادمة وغير متوقعة، حيث السيد عاد وقع عقود مع اللاعبين، كفاش هادشي وعلاش نزل الاستقالة ف12 دْليل، واش خْبر والي الجهة بالاستقالة؟.
مصادرنا قالت أن الشرقاوي يقضي اجازته في ماربيا الإسبانية، والبارح التقى ببودريقة رئيس الرجاء فكوسطا، وكتفاهمو على شي لاعب، وربما الشرقاوي تلقى اتصال باش ينزل السوارت حيث الفلوس والدعم ما كاينشي، راه خسو يوفر مليار و200 مليون باش يأهل اللاعبين، ماين غادي يجيبا؟، شاف راسو غادي يوغل ويوقعلو بحال الرئيس السابق أحكان، وقال نمشي بحالي وراسي عالي احسن.
مقرب من الشرقاوي قال، أن الأخير يلعب ورقته الأخيرة لجلب الدعم وسْيّب البالون في ملعب الوالي، عليها نزل الاستقالة غير فالفيسبوك، ومع ضغط الجمهور غادي يتحرك ويخلص ليتيج للجامعة، وحتى هاد الفرضية مطروحة بقوة.
پوبليكو ومنخرطين طالبوا الشرقاوي باش يتراجع عن الاستقالة، في انتظار تحرك مسؤولي المدينة لإنقاذ الفريق ماديا.
