إلْفوندو / أصيلة
الكل يتساءل شنو واقع فجماعة ديال محمد بن عيسى، لْوزٍيرْ السابق، ولٍي كٍسير مدينة أزيلا لمدة ديال 47 سنة، خصوصا فالشْنديلة أو الصراع لي واقع ما بين النائب الأول ديالو وما بين لموظف لْكْراد، حيث كولشي لاحظ الغياب ديال الموظف، وهي الحاجة لي خَلاّت الناس كتسول واش جناح ديال النائب الأول الوهمي، لي ما عندو حتى صلاحية حقيقية انتصر على الموظف لكراد فأزيلا.
عيون “إلفوندو“، أكدت أن الموظف السامي أو لْكرادْ، ولكان كِمارس اختصاصات ماشي ديالو، ويُعطي لراسو صلاحيات ماشي من حقو، خْرج كونْجي من الخدمة لمدة كتوصل تقريبا لشهرين ونص، وهو أمر غريب، حيث هد السيد ماشي الله يحفظو مريض بشي مرض ليمكن يأخد فيه هد المدة كاملة.
العيون ديالنا، أكدت أن الرجل لم يضع شهادة طبية، وإنما أشياء أخرى هي لخلاتو يبتعد عن الخدمة ديالو لمدة كتقترب من 70 يوم، خصوصا وأنه سبق ليه طلب كونجي لمدة 2سيمانات فأخر شهر 8 ولكن واش خداه أو لا الله وأعلم.
المهم المقربين من خبايا جماعة أزيلا كتأكد لنا أن الضغط ليه كتعرض ليلو السيد من طرف النائب الأول لي باغي يجمع حب وتبن، وخا السيد لا يفقه شيئا في التسيير هو السبب، كما ان الموظف السامي، يعمل كل ما فجهدو بش ينتقل لطنجة، ويخدم مع ليموري “العمدة”.
هاد الصداع كامل، للأسف ما وصلت للزعيم والباطرون ديال أزيلا سي بن عيسى، لي عايش مع راسو غير المْساريات ولْبْرُوجٍيات ديال لْخلجيين، وهذ الرْوينة لي كاع ما كتوصل لبنعيسى راها بفضل عبد الله الكعبوري، لصراحة ما كِدخل راسو فصداعات وسبق تكلم مع النائب الأول يعمل عقلو، وحاول مع الموظف بش يبرد لكن والو.
الكعبوري كما صرح مؤخرا في لقاء لحزبي داخلي، أن استمرار ديالهم في التسيير وتقوية الحزب كبدا من خدمة المواطنين بدل الصراعات الخاوية، لكن عورْها ملي عوض مكان الموظف لكراد، بصاحبو فؤاد ولي معروف عليه العداوة ديالو مع الموظف لكراد ديالنا، وخا سي فؤاد فالأول قال لا، لكن وافق وعلى ما يبدو كخدم مور ظهر ديال الكعبوري وكنسق مع النائب الأول سي جابر.
المهم أزيلا صغيرة ومحاينها كبار، والشغل بدا ككبر، والكعبوري الذي يحضى بثقة الوزير السابق بن عيسى، وبإحترام ساكنة أزيلا لقى راسو فالمصيدة، فهل ينتصر لصوت العقل ويفك هد لحريرة؟، اولا تغلب عليه العاطفة وينتصر لجهة على جهة اخرى؟.
