إلْفوندو / الرباط
اعلن عزيز أخنوش، رئيس حزب التجمع الوطني للأحرار، باللي الولاية ديالو على راس حزب الحمامة غادي تسالي مع تنظيم مؤتمر وطني استثنائي الشهر الجاي، ووضح باللي ما غاديش يترشح مرة اخرى لرئاسة الحزب.
وجا هاد الكلام فلقاء تواصلي دارو اليوم الاحد فالرباط مع مدراء نشر ديال منابر اعلامية، وقال فيه باللي الحزب غادي ينظم المؤتمر الوطني الاستثنائي نهار 7 فبراير الجاي فمدينة الجديدة، وغادي يعرف تجديد الهياكل وانتخاب رئيس جديد.
وشدد أخنوش باللي من الاول كان ضد الترشح المفتوح، وكيشوف باللي الافضل تكون رئاسة الحزب محدودة فولايتين فقط، وهاد الشي حتى هو منصوص عليه فالفصل 34 من النظام الاساسي ديال الحزب، وكيأكد على اهمية التداول على المسؤولية.
وبخصوص بقاىه رئيس الى ما بعد الانتخابات، قال أخنوش باللي صعيب يبقى غير شي ستة شهور ومن بعد يتبدل الرئيس حيث هاد الصورة ما مزياناش، وزاد قال حتى النجاح فالانتخابات والمشي مباشرة كيبقى صعيب يتقبل.
واعتبر أخنوش باللي ساهم فواحد التحول الكبير داخل الحزب ف12 جهة ديال المغرب، سواء من ناحية تطوير المقرات او تقوية المؤسسات، وساهم حتى فنجاح بزاف ديال الاوراش اللي اطلقها الحزب بحال مسارات المدن وبرنامج الثقة، وكشف باللي الاسبوع الجاي غادي ينطلق مسار الانجاز.
وزاد قال باللي غادي يخلي الحزب فواحد الوضعية مزيانة، واعتبر باللي دابا هو الوقت المناسب باش تتجدد القيادة، وقال باللي خدم بمهنية ودير داك الشي اللي جا على ودّو.
وكشف أخنوش باللي اعضاء المكتب السياسي كانوا باغيينو يبقى رئيس، ولكن بعد نقاش حاد قدر يقنعهم باللي الحزب ماشي ارث، وان الوقت دابا مناسب باش تتجدد القيادة وتستمر الدينامية ديالو.
