إلْفوندو / طنجة
نايضة بالقصر الكبير هد الأيام، خصوصا أن الكواليس السياسية كتداول خبر فضيحة جديدة بطلها سياسي كبير على مستوى نفس المدينة، والموضوع كخص عملية استحواذ على هبة كبيرة مقدمة للمجتمع المدني القصري من طرف أحسن ظهير أيمن فالعالم “أشرف حكيمي” وهي نفس المدينة ديال الوالدة ديالو.
عيون “إلفوندو” بالقصر الكبير، أكدت أن الأمر كتعلق بهبة مالية عطاها اللاعب الدولي أشرف حكيمي لمدينة القصر الكبير، من باش يعملوا مشاريع ريضاضية بالمدينة ويخدموا البنيات التحتية ديالها.
حكيمي أرسل جوج دفعات فشهر فبراير الماضي، الحوالة أو الدفعة الأولى كانت بمبلغ مليون ونصف درهم، والثانية بمبلغ جوج مليون ونص ديال الدرهم، يعني المجموع 4 دمليون ديال الدرهم.
المبلغ حسب العيون ديالنا، توضعت فالحساب ديال تعاونية للعمل الاجتماعي مسجلة بالقصر الكبير، هذه التعاونية الرئيس الحقيقي لها هو سياسي كبير بالإقليم وبالمدينة.
بعد هد الفضيحة، كولشي بدا كتساءل عن مصير 400 مليون سنتيم، خصوصا بعد دخولها إلى حساب التعاونية المذكورة، ولماذا لم يتم الإعلان عن هذه الهبة التي قدمها اللاعب المغربي لمدينة القصر الكبير.
