إلْفوندو / الرباط
ربح المنتخب المغربي ماتش ثمن نهائي كاس افريقيا للامم على حساب تنزانيا بواحد لزيرو، فالمباراة لي تلعبات مساء الاحد فالمجمع الرياضي الامير مولاي عبد الله فالرباط، وبهذا الفوز تأهل اسود الاطلس لربع النهائي.
قبل ما تبدا المقابلة، عاش الجمهور لحظة مؤثرة ملي دخل عز الدين أوناحي لارضية الملعب وهو كيتسند على عكازين، وسط اخبار كتأكد باللي الاصابة غادي تبعدو على الميادين شهر ونص تقريبا، وهو الشي لي اثر بزاف فالمعنويات.
وليد الركراكي دخل الماتش بتشكيلة فيها ياسين بونو فالحراسة، وقدامو حكيمي، أكرد، ماسينا، ومزراوي، وفالوسط العيناوي، الصيباري، والخنوس، وفالهجوم دياز، الزلزولي، والكعبي.
اول خطر جا من الجانب التنزاني فالدقيقة الثالثة، بهجمة سريعة من الجهة اليسرى، ولكن الضربة الراسية دازت حد المرمى ديال بونو.
المنتخب المغربي رد بهدف فالدقيقة الرابعة عشر، جا من ضربة حرة سجلها الصيباري، ولكن الفار تدخل وتلغى الهدف بداعي التسلل.
الفرحة المغربية جات فالدقيقة الرابعة والستين، ملي توغل إبراهيم دياز وسط الدفاع وسدد كرة قوية سكنت الشباك، واحتفل بالهدف رافعا قميص عز الدين أوناحي فاشارة انسانية صفقات ليها الجماهير.
