إلْفوندو / المغرب
كشفت مصادر قريبة من المنتخب المغربي ديال كرة القدم داخل القاعة أن المغرب غادي ينظم نهائيات كأس إفريقيا للأمم للفوتسال 2026، وهاد الشي كيجسد المكانة القوية اللي ولى كيتحظى بها المغرب قاريا فهاد اللعبة فالسّنين الأخيرة.
وحسب معطيات متوفرة، فالنسخة الجاية من كأس إفريقيا للفوتسال مرجح تدار فشهر أبريل 2026، بمشاركة ثمانية منتخبات، سبعة منهم غادي يتأهلو عبر الإقصائيات الإفريقية، وزيد عليهم المنتخب المغربي بحكم أنه البلد المنظم. وهاد البطولة غادي تكون مهمة بزاف حيث غادي تحدد المنتخبات اللي غادي تمشي لكأس العالم للفوتسال 2026.
اختيار المغرب لتنظيم هاد التظاهرة جا نتيجة الثقة الكبيرة اللي ولى كيعطيها ليه الاتحاد الإفريقي لكرة القدم، خصوصا من بعد النجاحات التنظيمية والتقنية اللي عرفاتها البطولات اللي تنظمات فالمملكة سواء عند الرجال ولا السيدات.
وفهاد الإطار، قرر الكاف يبدل نظام البطولة، ولى كأس إفريقيا للفوتسال غادي تنظم كل جوج سنين بلاصت كل أربع سنين، فخطوة جديدة الهدف منها تطوير اللعبة ورفع مستوى التنافس بين المنتخبات الإفريقية.
والمغرب سبق ليه نظم جوج نسخ من كأس إفريقيا للفوتسال ديال الرجال وتوج بهما كاملين، نسخة 2020 تنظمات فالعيون وتوج فيها المنتخب المغربي بعد فوز كبير على مصر فالفينال، ونسخة 2024 تنظمات فالرباط وواصل فيها أسود الفوتسال السيطرة ديالهم القارية بتتويج ثالث توالي بعد الربح على أنغولا.
وماشي غير الرجال، حتى السيدات تألقو، حيث الرباط احتضنت أول نسخة من كأس إفريقيا للفوتسال للسيدات سنة 2025، والمنتخب المغربي توج باللقب بعد فوز صعيب على تنزانيا فالمباراة النهائية، وهاد الشي أكد باللي المغرب ولى رائد إفريقيا فهاد اللعبة عند الرجال والعيالات.
تنظيم نسخة 2026 كيبين باللي المغرب مازال مستمر فالرهان على تطوير كرة القدم داخل القاعة، وتعزيز الإشعاع الرياضي ديالو قاريا ودوليا، فانتظار الإعلان الرسمي على الملاعب والبرنامج الكامل ديال البطولة فالفترة الجاية.
