إلْفوندو / طنجة
زيارة رشيد الطالبي العلمي لمقر الأحرار فطنجة ما زادت غير سخّنات الوضع داخل الحزب، خصوصا عند الناس اللي باغيين يترشحو للبرلمان. الاجتماع كان فيه هضرة على بزاف ديال المدن، ولكن طنجة بقات خارج الحساب، وهادشي خلا الباب محلول للإشاعات وزاد التوتر بين المناضلين.
الصراع داير بين رئيس فريق الاحرا بمجلس جماعة طنجة عبد الواحد بولعيش ونائب عمدة طنجة عصام الغاشي، ولكن دخل اسم جديد بقوة هو عبد الواحد عزيبو المقراعي، اللي كتشوف فيه قيادات فالحزب خيار مناسب حيث عندو تجربة فالإدارة وكفاءة فالتدبير.
حتى عبد الحق النجاري، رجل أعمال معروف فالنقل والتعشير، حاضر فالكواليس وعندو دعم من قيادات مركزية، وهاد الشي زاد عقد الوضع.
المعطيات كتشير أن عزيبو المقراعي مدعوم من عزيز أخنوش والطالبي العلمي، ولكن الحسم مازال ما بان، وطنجة باقية “ملغومة” سياسيا حتى إشعار آخر.
