إلْفوندو / طنجة
تعرض صاحب شركة ديال الصباغة لإعتداء داخل مكتب بارون سابق ومنعش عقاري معروف فْطنجة ، بعدما وصل الخلاف بينهم حتى للدائرة الأمنية باش كل طرف يدلي بأقوالو بخصوص المشكل القائم.
وكتقول المعطيات المتوفرة إن أصل النزاع راجع لمعاملات وخدمات سابقة، بحيث كيشدد صاحب الشركة باللي مازال عندو فلوس كبيرة عند الطرف الآخر، مقابل أشغال سبق دارها، وكيطالبو يخلصو مستحقاتو اللي بقات معلقة.
وزاد نفس المصدر باللي الخلاف تطور داخل مكتب البارون السابق، فين كيقول مول الشركة إنه تعرض لاعتداء، وقرر على إثر هاد الشي يلجأ للأمن ويدير شكاية رسمية باش يتخذو الإجراءات القانونية اللازمة.
فالجهة المقابلة، البارون السابق نفى الرواية المتداولة، وأكد باللي عندو وجهة نظر مختلفة بخصوص اللي وقع، سواء فموضوع الفلوس أو الادعاء ديال الاعتداء.
ودابا المصالح الأمنية كتواصل البحث مع الطرفين، تحت إشراف النيابة العامة، من أجل كشف جميع تفاصيل وملابسات هاد القضية.
