إلْفوندو / الريف
تْرجعت شبكات تهريب المخدرات فالناظور والدريوش والحسيمة كتعتمد بشكل كبير على طوموبيلات بلوكات مزورين باش تهرب الحشيش والممنوعات وتفلت من السدود الأمنية. هاد الطوموبيلات كيكونو غالبا مسروقين، وكيتم تبديل الأرقام ديال الشاصي والوثائق والصفائح داخل مستودعات سرية، باش يبانوا قانونيين قدام الأمن والدرك.
وحسب معطيات متداولة، بزاف ديال الطوموبيلات اللي تشدات وسطها المخدرات فالشمال، تبين بالخبرة التقنية أنها مزورة، وكيستعملوها المهربين فالطريق الساحلي بين الحسيمة والناظور وحتى فالطريق الوطنية رقم 2 باش ينقلو السلع الممنوعة بسهولة.
الأمن الوطني والدرك الملكي كيكثفو الحملات ديالهم بشكل يومي، وقدرو يفككو شبكات خطيرة وتنظيمات كتستعمل هاد الطوموبيلات فالتهريب وحتى فالهجرة السرية. وآخر العمليات الأمنية خلات لحجز سيارات ودراجات نارية مزورة وصفائح ترقيم مختلفة، مع توقيف مبحوث عنهم فقضايا المخدرات والتزوير.
