إلْفوندو / المغرب
ابتداء من اليوم الثلاثاء، غادي تعرف مجموعة من الأقاليم فالمغرب موجة حر قوية، حسب نشرة إنذارية من مستوى يقظة برتقالي صدرت عن وزارة التجهيز والماء.
الوزارة أوضحت بلي الحرارة غادي توصل ما بين 39 و44 درجة فعدد من المناطق الجنوبية، بحال السمارة، آسا الزاك، بوجدور، وادي الذهب، أوسرد وطاطا، وغادي تستمر هاد الموجة حتى لنهار الجمعة 29 ماي.
حتى مناطق أخرى فالمملكة غادي تعرف طقس سخون ما بين 37 و42 درجة، يومي الثلاثاء والأربعاء، ومن بينها سيدي سليمان، الرحامنة، النواصر، الخميسات، سيدي بنور، اليوسفية، بني ملال، الفقيه بن صالح، مكناس، خنيفرة، فاس، القنيطرة، سيدي قاسم، بن سليمان، برشيد، خريبكة، سطات، شيشاوة، قلعة السراغنة، مراكش، مولاي يعقوب، تاونات، العرائش، وزان، الصويرة، آسفي، كلميم، تارودانت، طانطان، العيون وطرفاية.
وكيُنصح المواطنين يتفاداو الخروج فالوقت اللي كتكون فيه الشمس قوية، ويشربو الماء بزاف، خصوصا الأطفال والناس الكبار فالسن واللي خدامين فالخارج.
