إلْفوندو / اسبانيا
فْككات الشرطة الإسبانية شبكة إجرامية كانت كتهرب الحشيش والكوكايين من شمال المغرب نحو إسبانيا وفرنسا باستعمال درونات متطورة.
وحسب السلطات الإسبانية، تم توقيف 8 أشخاص، وكانو كيعتمدو على طائرات بدون طيار كبار مجهزين بأربعة محركات، يقدرو ينقلو حتى لـ20 كيلو ديال المخدرات بسرعة كبيرة عبر مضيق جبل طارق.
ومن بعد ما كتوصل الشحنات لجنوب إسبانيا، كيتنقلو فطوموبيلات فيها مخابئ سرية نحو فرنسا.
العملية اللي سميتها الشرطة “حورس” خلات حجز حوالي 40 كيلو ديال الحشيش، وكيلوغرامين ديال الكوكايين، وسيارات ودرون كانت كتستعمل فالتهريب.
هاد القضية رجعات النقاش حول استعمال عصابات المخدرات للتكنولوجيا الحديثة، خاصة الدرونات، باش يفلتو من المراقبة الأمنية بين المغرب وإسبانيا.
