إلْفوندو / بنسليمان
خيم الحزن على الوسط الفني ومجال تصميم الأزياء فالمغرب، بعدما تلقاو الناس خبر العثور على مصممة الأزياء التقليدية بشرى المرزوقي مفارقة للحياة داخل طوموبيلتها بمنطقة المنصورية التابعة لإقليم بنسليمان، بعد أيام من اختفائها.
الراحلة كانت غبرات عن الأنظار من نهار 25 يونيو، وهو الشي اللي خلا العائلة ديالها وعدد كبير من المتابعين يطلقو نداءات عبر مواقع التواصل الاجتماعي باش يساهمو فالبحث عليها، قبل ما يتأكد خبر وفاتها.
وفور العثور على الجثة، عرف المكان استنفارا أمنيا، حيث حلت السلطات المحلية وعناصر الدرك الملكي والشرطة العلمية، وبدات المعاينات ورفع الأدلة، قبل ما يتم نقل الجثمان لمستودع الأموات من أجل إخضاعه للتشريح الطبي بأمر من النيابة العامة المختصة.
ومازال البحث مفتوح باش يتم الكشف على جميع ظروف وملابسات هاد الواقعة، وتحديد السبب الحقيقي ديال الوفاة، واش ناتجة عن أسباب طبيعية أو كاينة شبهة جنائية.
