إلْفوندو / الشمال
عينات القيادة العليا للدرك الملكي، بقيادة الجنرال دوكور دارمي محمد حرمو، النقيب محمد الرباعي قائدا جديدا لسرية الدرك الملكي بمدينة طنجة، وذلك ضمن الحركة الانتقالية الأخيرة اللي همّت عددا من المسؤولين بمختلف القيادات والسرايا عبر ربوع المملكة.
وجا الرباعي لطنجة بعدما كان كيقود سرية الدرك الملكي بمدينة السمارة، وقبلها خدم بمدينة طرفاية، وراكم تجربة ميدانية مهمة فالمناطق الجنوبية، خصوصاً فمواجهة شبكات التهريب والجريمة والهجرة غير النظامية.
وخلال السنوات اللي دازها فالسمارة، عرف عليه القرب من الميدان، والتنسيق المستمر مع باقي الأجهزة الأمنية والسلطات المحلية، واعتماد أسلوب استباقي فالتعامل مع مختلف القضايا الأمنية، الشي اللي خلا المنطقة تعرف استقراراً أمنياً ملحوظاً.
وما كانش الرباعي غير مسؤول صارم، بل حتى التعامل ديالو مع المواطنين خلاه يكسب احترام وتقدير عدد كبير من الساكنة، اللي كانت كتشيد بطريقة خدمتو وحضورو الدائم لحل المشاكل.
وغادي يخلف النقيب محمد الرباعي الرائد مهدي معزوف، اللي تم تعيينه قائدا لسرية الدرك الملكي بالمحمدية، بعدما قضى سنوات من العمل بمدينة طنجة.
وكيجي هاد التعيين فمرحلة كتواجه فيها طنجة تحديات أمنية كبيرة، بحكم الموقع الاستراتيجي ديالها، والحركة الاقتصادية والمينائية والسياحية اللي كتعرفها، إضافة إلى محاربة شبكات الاتجار الدولي بالمخدرات والهجرة غير النظامية وتعزيز الأمن الطرقي.
ومن المرتقب أن يباشر الرباعي مهامو الجديدة تحت إشراف القائد الجهوي الكولونيل ماجور الملكوني، مستفيدا من التجربة اللي راكمها فالجنوب، باش يساهم فتعزيز الأمن والاستقرار وخدمة المواطنين بجهة طنجة.
