إلْفوندو / إيطاليا
مات مهاجر مغربي بمدينة بولونيا الإيطالية، وهو تحت تدخل ديال عناصر البوليس، فحادثة خلات جدل كبير فإيطاليا بعدما خرج فيديو كيوثق اللحظات الأخيرة ديالو وانتاشر بشكل واسع فمواقع التواصل الاجتماعي.
الفيديو كيبين الضحية وهو كيغوت وكيطلب النجدة، وكيقول: “باراكا… باراكا”، بينما كانو جوج ديال البوليس مثبتينو فالأرض وكايكملو يقيدو ليه رجليه، قبل ما يفقد الوعي وسط صدمة الناس اللي كانو حاضرين.
وحسب وسائل إعلام إيطالية، فالشرطة مشات لحي “بيلاسترو” فضواحي بولونيا بعدما توصلات ببلاغات من السكان على شخص كان، حسب روايتهم، فحالة هيجان وكيدير تصرفات عنيفة، ومشات حتى سيارة الإسعاف مع الدورية الأمنية.
من بعد الوفاة، النيابة العامة الإيطالية فتحات تحقيق باش تعرف شنو وقع بالضبط، وتحدد واش كان شي تجاوز أثناء عملية التوقيف ولا لا، خصوصا بعدما ولى الفيديو كيدور بشكل كبير وخلا بزاف ديال التساؤلات حول الطريقة اللي تعاملات بها الشرطة مع الضحية.
