إلْفوندو / مراكش
قضات المحكمة، اليوم الاثنين، بـ10 شهور ديال الحبس النافذ فحق سكينة المعروفة فمواقع التواصل الاجتماعي بـ”كلامور”، على خلفية القضية اللي تتابعات فيها من بعد توقيفها خلال الأيام الماضية.
وحسب المعطيات المتوفرة، الحكم تضمن حتى غرامة مالية قدرها 500 درهم، وزاد عليها المنع من استعمال والظهور فمواقع التواصل الاجتماعي لمدة ثلاث سنين.
وكانت سكينة “كلامور” توقفات فمطار محمد الخامس الدولي بالدار البيضاء وهي كتستعد تغادر التراب الوطني، قبل ما يتم إخضاعها للإجراءات القانونية وتقديمها أمام النيابة العامة المختصة.
القضية جات على خلفية محتويات كانت تنشرات عبر منصات التواصل الاجتماعي وخلقات جدل كبير، قبل ما يوصل الملف للقضاء ويصدر الحكم بالحبس النافذ، بالإضافة لعقوبة المنع من السوشيال ميديا لمدة ثلاث سنوات.
وكيعتبر هاد المنع واحد من أبرز العقوبات اللي تضمنها الحكم، خصوصا أن شهرة سكينة “كلامور” مرتبطة بشكل كبير بحضورها ونشاطها عبر مواقع التواصل الاجتماعي، وهو ما يعني أن الحكم ما اقتصرش غير على العقوبة الحبسية، وإنما امتد حتى للنشاط الرقمي ديالها.
