إلْفوندو / طنجة
علمت إلفوندو من مصادرها أن الموظف المتقاعد، اللي كان كيتوصف وسط كواليس جماعة طنجة بـ”لابواط نوار”، كيسابق الزمن وكيحرك خيوطو، مستعينا بمسؤول مقرب منو، باش يرجع للواجهة ويستعيد نفوذه داخل ثلاث مؤسسات، وهي جماعة طنجة، ومؤسسة التعاون بين الجماعات “البوغاز”، ومجموعة الجماعات الترابية المكلفة بتوزيع الماء والكهرباء، ولو من وراء الستار، كيفما كان الوضع من قبل.
وحسب ما وصل لآذان إلفوندو، فإن الموظف المتقاعد حريص بشكل كبير على الرجوع للمكتب اللي كان كيشغلو، وكيبحث على مختلف السبل اللي تضمن ليه الاستمرار فالتأثير على دواليب هاد المؤسسات، رغم أن العلاقة المهنية ديالو بالإدارة سالات بإحالته على التقاعد.
هاد التحركات، وفق المصادر ذاتها، خلات عدد من المنتخبين ونواب العمدة الموجود رهن الاعتقال يتساءلو على سر هاد التشبث الغريب بالمكتب والكرسي، وعلاش موظف سالات مهامو رسميا مازال مصر على البقاء قريب من مراكز القرار والتسيير.
مصادر إلفوندو كتعتبر أن هاد الإصرار كيطرح أكثر من علامة استفهام، خصوصا فظل الحديث على مساندة مسؤول مقرب من المعني بالأمر، وهو ما كيزيد يطرح السؤال على حدود تدخل أشخاص ما عندهم حتى صفة رسمية فشؤون المؤسسات المنتخبة.
فشنو السر وراء هاد الحرص على العودة؟ وشنو المصلحة اللي كتخلي موظف متقاعد متشبث بالتواجد داخل ثلاث مؤسسات؟ وشكون اللي كيساندو وكيحاول يرجعو للواجهة؟
أسئلة كتطرحها مصادر إلفوندو، واللي كتأكد أن الأيام المقبلة قد تكشف معطيات إضافية حول هاد التحركات وخلفياتها.
