إلْفوندو / الجزائر
وْلات البطاطا فالجزائر موضوع كيشعل النقاش والجدل، بعدما عرفات الأثمنة ديالها ارتفاع كبير، وولات من المواد الغذائية اللي كتقلق المواطن الجزائري، خصوصا العائلات البسيطة اللي كتعاني أصلا مع الغلاء وضعف القدرة الشرائية.
والغريب فهاد الأزمة أن الجزائر، اللي كتعتبر من الدول الغنية بالبترول والغاز، ولى فيها المواطن كيتسنى فطوابير طويلة باش يشري غير شي كيلوغرامات ديال البطاطا، وهو المشهد اللي خلف موجة ديال الغضب والسخرية وسط الجزائريين.
مواقع التواصل الاجتماعي حتى هي شاعلة بالتعليقات والتدوينات الساخرة، بعدما عبر بزاف ديال الجزائريين على الاستياء ديالهم من هاد الوضع، وتساءلو كيفاش بلاد عندها ثروات طبيعية ضخمة ما قادراش تضمن استقرار ثمن مادة غذائية بسيطة بحال البطاطا.
وهاد الأزمة رجعات للواجهة أسئلة محرجة للحكومة الجزائرية على فين مشات برامج دعم الفلاحة وضبط الأسواق، وعلاش كل مرة كيتعاود نفس السيناريو مع المواد الغذائية الأساسية.
وبين الغلاء والطوابير والغضب الشعبي، ولات البطاطا عنوان جديد لمعاناة المواطن الجزائري مع المعيشة، فبلاد عندها ثروات طاقية كبيرة، ولكن هاد الثروات ما بايناش آثارها على المائدة اليومية ديال المواطن البسيط.
