متابعة – أبو نهى
فْالوقت لي كُنتظر عدد كْبير من الدْرواش بمدينة طنجة ظهور تصميم التهيئة والمصادقة عليه من طرف السلطات الولائية والوزارة الوصية، باش يقدرو يبنيو قبر الدنيا بطريقة قانونية بعيدا عن مطرقة القايد ومنشار المْقدمية، كانو أصحاب كروش لْحرام فقطاع البناء والتسمسير والسياسة عملو شغلهم وخربقوا مزياااان دك پلان داميناجْمون، وباعوا وشْراو فعباد الله وهما فدار غفلون، ورْجعت مناطق خضراء بجرّة قلم مع شْكارة كْبيرة تجزئة سكنية، وملاعب للقرب رجعت R3 والعلو زاد طلع فمنطقة ديال الفيلات وطلع معه حتى الثمن ديكلاري ونْوار بجوج، المهم كيف ما كتبنا لْفوق، خَرْبقو دِك پلان داميناجْمون مزيان، ولي جا معطل كعمل يدو فيه حتى رجع بحال كامپو دكرة، وخا توصل معطل أجي عْمل يْدّك فپلان وشحال ما رخيتي يْترخاو معك.
مصادر كونْفيانصا قالت لإلْفوندو، أن التصميم ديال مقاطعة طنجة المدينة واجْد، ولي لعبو فيه لمصالح ديالهم وديال الزبائن ديالوم كضربو الطاسّة ونَشْطانين مع راسهم، والدْراوش موالين قطع أرضية ديال 70 و60 متر..، أجركم لله والسلام، ولي ما لحق شي حاجة فالدنيا، فالجْنّة إن شاء الله.
ولتنوير ساكنة طنجة أن پلان جْديد عادي يكون صادم وغادي تبان آثار الأيادي السوداء لي لعبت فيه.
