إلْفوندو / طنجة
اسم والي جهة الشمال الجْديد يونس التازي اشتغل مزيان هاد الأيام فْمحرك غوغل الخاص بالصالونات السياسية فمدينة طنجة، رجال المال والأعمال والمقاولين وصحاب الشركات الكْبار بدورهم يبحثون عن الدَخلة او الكود ديال الوالي الجْديد لي باقي شخصية ديالو ماشي واضحة وخا اشتغل فتطوان قريبة من طنجة إلا أن الوضع يختلف على جميع المستويات.
الأخبار الواردة من تطوان، تقول أن الوالي معقول ونيشان ويكره القيل والقال، يعني صْحاب التبحليس ومْسيح الماپة لا مكان لهم فْالطالبق الرابع، الحدّ ديالهم الطابق الثالث واذا وصلوا ليه مع هاد الشاف الجْديد، وهو ما أربك حسابات المنتخبين خصوصا المخروضين ولي فكرشهم لْعجينة.
مصدر موثوق قال لإْفوندو، أن الوالي الجْديد عندو ملفات فساد وخروقات على طاولة مكتبه أبطالها منتخبين، ومن المؤكد أنه سيتم التضحية بهم لتعبيد الطريق وتخويف الباقي، هيبة الدولة والمؤسسات آشريف هادي.
عمدة المدينة لي عندو مشاكل معقدة مع النواب ديالو والأغلبية فالمجلس الجماعي، حتى هو متوتر وما عارفش كفاش سِيسْتيما ديال الوالي يونس التازي، وضف عْليهم حتى رؤساء المقاطعات بطنجة ورؤساء الجماعات المجاورة، متوترين حتى هما خصوصا الفاسدين منهم.
