بزاف ديال السياسيين ورجال الأعمال بطنجة بداو كعتبرو أن طنجة بقرة حلوب، وبداو كوجهو الإستثمارات ديالهم للمدينة، لكتعرف اقبال كبير، لدرجة أن المدينة بدات كتعرف اكتظاظ سكاني بزاف.
عيون إلْفوندو، أكدت أن العمدة السابق لمدينة فاس “حميد شباط”، ولي سبق ليه كان أيضا الأمين العام ديال حزب الإستقلال، دْخل مجال الإستثمار فْقطاع العقار مؤخرا.
شباط سْمح ففاس، واختار الشمال وبالضبط طنجة، باش يولي طاشرون فالبناء، ويعمل مشاريع عقارية خاصة بالسكن الإقتصادي والمتوسط، خصوصا أن هاد المجال فطنجة فيه لْعاقة زايدة.
عيوننا أكدت أن الأمر كِتعلق بمشاريع سكنية جات قرب المحطة ديال الكِيران الجديدة، وهو المكان لبدا كِسيل لعاب ديال العديد من المستثمرين.
وأكدت المصادر ديالنا، أن مشاريع السكن الاقتصادي، دخلها شباط بشراكة مع مستثمرين عارفين مزيان ضومين ديال العقار، خاصة بعد الطلب المتزايد على السكن في مدينة طنجة.
شباط لسبق أن شغل منصب عمدة فاس، بدا كفكر يستقر بشكل دائم ونهائي بمدينة طنجة، واش التواجد ديالو غادي يقتصر غير على العقار أو ربما يمارس السياسة بطنجة؟، خصوصا أنه دخل الإنتخابات الأخيرة بحزب “الزيتونة”، وهو الحزب لي حْصل على جوج المقاعد بالمجلس الجماعي بطنجة.
