إلْفوندو / طنجة
توصلت “الفوندو” بتبركيكة، كتقول ان حزب الحمامة او التجمع الوطني الأحرار بطنجة، نايضة فيه روينة بسباب قفة الجود، وهي القفة لتوزعت حسب المصادر بباك صاحبي عوض توزع بالعدل على اعضاء الحزب.
وخا السلطة صدرت قرار عدم توزيع القفة، الا ان صحابنا فالأحرار ما كاين غير وزع فالقفاف، فحملة إنتخابية سابقة للأوان ديالها، لكن المهم من هد شي كامل هي الروينة لناضت فالحزب.
مصادر “الفوندو”، أكدت أن قيادي بالحزب ونائب العمدة وزع القفاف على صحابو فالحزب وتهلى فيهم مزيان، وعكة حتى للناس خارج الحزب وخا هما فأحزاب أخرى بمقاطعة بني مكادة وبمقاطعة مغوغة، فالوقت لعطى عدد قليل لبعض اعضاء الحزب وكاين لما عطاه والو لانه مقرب من غيلان النائب الأول للعمدة، حسب نفس المصادر.
الأعضاء ساخطين على القيادي ديال الأحرار لباغي يسيطر على الحزب لانه مقرب من المنسق الاقليمي، وها سياسة ديالو ما قدمت حتى اضافة للحزب.
واش القفة تقدر تفجر الحزب الحمامة بطنحة، وتبين أن الحزب ضعيف بزاف ومع ما يقدر يكون قوة سياسية مستقبلا بطنجة او بالاقليم، والسبب هي القيادة الحالية للحزب.
