إلْفوندو / طنجة
شاعلة بحزب التجمع الوطني للأحرار فجهة طنجة تطوان الحسيمة، بسبب ممارسات المنسق الإقليمي ديال الحزب فطنجة، عمر مورو، واللي هو أيضا رئيس مجلس جهة طنجة تطوان الحسيمة.
مصادر من داخل الحزب قالو لـ “إلْفوندو” بلي شي منسقين ديال الأقاليم ورؤساء ديال الجماعات فالجهة صيفطو خبر للمنسق الجهوي، رشيد الطالبي العلمي، كيعبرو فيه على الغضب ديالهم من التصرفات ديال عمر مورو والطريقة اللي كيتعامل بيها معاهم، اعتابرو بلي القرارات ديالو بوحدو والنهج الإقصائي اللي كيعبر بها فبعض المحطات، ولى كيعرقل بزاف ديال المشاريع التنموية فشي جماعات.
وزادو نفس المصادر بلي الطالبي العلمي جاوه إشعارات من هاد المسؤولين الحزبيين كيقولو فيه بلي إلا بقى هادشي غادي يقاطعو أي اجتماع جهوي أو لقاء تنظيمي فطنجة، إلا ما بدّلش مورو العقلية ديالو ورجع كيخدم بطريقة ديمقراطية وماشي استبدادية.
الغضب التنظيمي على عمر مورو وصل حتى العائلة السياسية ديالو، واللي ولات كتشد على “آل مورو”، هادشي بدا من طنجة وكبر بعدما بان ضعف المنسق الإقليمي فإدارة شؤون الحزب محليا، خصوصا من بعدما منير ليموري، القيادي فالأصالة والمعاصرة وعمدة المدينة، سحب شي تفويضات من خاه عبد النبي مورو لي هو نائب العمدة، بزاف ديال المناضلين شافو هادشي بحال شي مؤشر ديال أزمة تدبير وسط “الأحرار”، وحتى كاين اللي قال بلي هادي ضربة قاضية ليهم.
